مبادرة تزوج بجنية لجمعيه سواعد شباب مصر

كانت عندي فكرة مشابهة

اننا نجمع من سكان شارعنا كتجربة يعني مبدئية جنيه واحد في الشهر من كل شقة

المبلغ دا بقى يتقسم علي حسب احتياجات الشارع

يعني لو فيه مثلا شقة محتاجة ترميم

طفل محتاج مصاريف درس

بيت محتاج بياض

شباب محتاج حاجه من العفش للزواج

و لو الفكرة لاقت نجاح هاتنتشر و المبلغ هايكبر بحيث يكون في مساهمة اكبر في حاجات محتاجة فلوس اكتر

زي مثلا يكون في شركة نضافة خاصه للحي

لو في شارع متهدم يترصف و هكذا

لكن و بكل اسف سكان عمارتنا ما بيهونش عليهم حتى يدفعوا صيانة العمارة و بيدخوا بابا لانه رئيس اتحاد الملاك علي ما يدفعوا

فا انطفت الفكرة جوايا

بس كويس ان في الحمدلله مبادارات طلعت للنور

ربنا يوفقهم ان شاء الله

بس الاهم ان الاهل يبطلوا المبالغات الفظيعة اللي بيطلبوها دلوقتي

يعني كنت في مصر و لقيت ان جهاز العرايس دلوقتي لازم يكون فيه حجرة اطفال مكونة من سريرين دا غير ان لازم يكون في غسالة اطفال بجانب الغسالة الاوتوماتيك

كمان لازم توستر و في الفلاحين لازم كمان فرن كبير بالغاز للخبيز

و لازم العروسة تجيب مش اقل من ٢٠ طقم سرير و زيهم فوط

يعني من الاخر الجهاز بيدخل بالميت في ٨٠ و ١٠٠ الف جنيه

و المصيبة ان في جوازات ممكن تبوظ عشان اوضه الاطفال ما اتجابتش مثلا