تعمل\ي ايه لو زوجك\تك فلولي\يه وانت ثوري\يه !!!

انت بتقرأ لعلاء الاسواني وهيا بتقرأ للميس جبر !
انت بتسمع لرامي عصام وهيا بتسمع عمرو مصطفى !
انت بتتفرج على وائل الابراشي وهيا بتتفرج على توفيق عكاشه !
انت بتبكي عشان ارواح الشهداء وهيا بتبكي عشان محاكمة مبارك !
انت بتقول ( كفاية ) اول من نادت بالثورة وهيا بتقول ( كفاية ) حرام عليكو خربتو البلد !!

مستني ردكم Sad

مساء الفل

صحيح اختلاف الاراء لايفسد للود قضية .... بس صعب اوي ان شريك حياتي يكون كدة ... وكمان بيسمع توفق عكاشة دي تبقى كارثة
بصراحة هتبقى مشكلة مش سهلة الحل ابداً .... زي بالظبط اتنين ايدولوجياتهم مختلفة تماماً .... هو سلفي وهو علمانية او العكس على سبيل المثال
انا ممكن اسمح ان صحبتي تكون كدة ,, لكن حد من عيلتي هيبقى صعب ... اومال بقى لو كان شريك حياتي ؟؟
اعتقد إن الحل الوحدي انهم يتجنبوا الحوار في الجوانب الخاصة بالمسألة دي ادام بعض ... والموضوع دة مش هيبقى سهل خالص لأن كل يوم فيه حدث جديد وفيه اختلاف جديد ........ لكن لو عايزين يحافظوا على علاقتهم واسرتهم مايحاولوش ابداً يتعرضوا للسياسة ولا يتفرجوا على قنوات اخبارية مع بعض
اصله مش ماتش اهلي وزمالك وهيخلص ...... دة فكر مابيخلصش
وربنا يستر بقى

هيكون التعايش صعب لكن اكيد مش مستحيل
هيتوقف على حاجات كتيره
منها مثلا درجه الانغماس فى اعتناق الفكره اد ايه
هل مجرد التشجيع و التبنى بدون اى خطوات اخرى و لا الامر تعدى للمشاركه الفعليه فى انشطه مؤيده للفكره دى
و درجه الخطر الى ممكن يمثله دا على الاسره اد ايه
و الحيز الى بياخده الاعتناق الفكرى دا من الزوج او الزوجه اد ايه بحيث هل هو بياثر فعلا على كيان الاسره الموحد و لا لا
عوامل كتيره بيعتمد عليها الموضوع
لكن بشكل عام فى ناس بتقدر تشوف فى الاختلاف دا تكامل و فى ناس مبتقدرش تشوفه الا انه تباعد
لكن لو فعلا الاساس بينهم متين و مصرين على انهم يكملوا مع بعض
اكيد هيقدروا يلاقوا ارضيه مشتركه او على الاقل اتفاقيه تعايش مشترك بطريقتهم الخاصه

بالعكس بقى

أنا مش شايفه إنها مشكله خالص

بالعكس يا جماعه خالص على فكره

دي هتبقى فرصه لذيذه جداً بدل ما الواحد عمال يتفرج على الناس اللي تفرس دي من بعيد

يعني بدل ما اتفرج على بتوع آسفين يا ريس و أتفرس و أنا مش طايله حد فيهم

..
و أسمع الشيخه ماجده و أبقى نفسي المذيع يخبطها على دماغها بالمايك و أهو يا تعقل يا تطب ساكته و نخلص .. و ألاقي المذيع مابيضربهاش و أنا مش طايلاها

..
و أسمع المدافعين عن القتله و أعصابي تلتهب كده منغير فايده

و أسمع اللي يشوه صورة الثوار بنات و شباب و أنا مش طايله أخليه يتوب إلى الله

لا خالص ..

هيبقى معايا و في البيت و جمبي واحد منهم ..

يا سلاااااام .. أما دي كانت تبقى حكايه يا ولاد

كان هيبقى منفث لكل اللي فاتوا دول .. و خد فين يوجعك و براحتي بقى

كنت كل ما اتضايق من حد أو من حدث أروح أفتح معاه نقاش في الموضوع و أنفث بقى عن غضبي معاه براحتي

يا سلاااااااااااام .. طب ده أنا كان زماني خليته قال حقي برقبتي و كان زمان أعصابي أهدى من كده بكتيييير

عالأقل ميبقاش كله شحن شحن شحن كده و بس .. لا يبقى فيه شوية فضفضه يعني برضه

بس هي المشكله إنه مفيش حد هيستحمل لوحده كل الغضب ده كل المده دي

ده إحنا بقالنا سنه في الموال ده
.

.

.

.

.

.

أنا طبعاً بهرج

.

.

نيجي للجد بقى

أعتقد إن اللي دماغه هتوصله لإنه يبقى فل من الفلول صعب يكون متعايش من البدايه بشكل سوي مع شريك حياه سوي (( شريك سوي يعني مش عضو في جماعة الفلول))

يعني لو فعلا في زوجين واحد مع الثوره و التاني مع الفلول يبقى أكيد حياتهم مش طبيعيه من قبل الثوره

فهيبقى عادي انها تفضل مش سويه حتى بعد الثوره
و دول بقى ربنا معاهم بجد

و الحمد لله الذي عافانا من مصيبه ذي دي ..
ربنا يديم علينا و على أزواجنا نعمة العقل

تحياتي للجميع و لحضرتك يا أستاذ تيمور

زهرة الجبل